Eine Auswahl von Mythen, Märchen, Sagen und Legenden rund um Wasser und Meer
 

De Seejungfer up Wittow

nixe

Up Wittow, nich wiet von't hoge Öwer, het ees 'ne Buersfruu wahnt, to de kem eenes Dags 'ne Seejungfer, as grad de Sünn so recht hell un warm schient. De Seejungfer, de för gewöhnlich in'n Water lewt un bloß denn un wenn an'n Strann kümmt, süht nah baben to as'n Minsch un nah unn' to as'n Fisch ut un is ganz nakt.

De Buersfruu was grad bi't Uptrecken von'n Flaß, as de Seejungfer bi ehr intred. De äwer kennt so wat nich un frog, as so 'ne niegligen Fruugenslüd dat inne Mod hebben, wat dat wir. De Buersfruu säd, dat wir Flaß, un davon würden Hemden makt.

  • De Seejungfer:  Is et denn 'n Hemd, wenn de Flaß uptreckt is?
  • De Buersfruu:    Nee, denn möt he irst röst't warden.

  • De Seejungfer:  Un is et denn 'n Hemd?
  • De Buersfruu:    Ne, denn ward he irst drögt.

  • De Seejungfer:  Un denn 'n Hemd?
  • De Buersfruu:    Ne, denn kümmt he in'n Backaben un ward beizt.

  • De Seejungfer:  Un denn 'n Hemd?
  • De Buersfruu:    Ne, denn ward he brakt.

  • De Seejungfer:  Un denn 'n Hemd?
  • De Buersfruu:    Ne, denn ward he schwungen.

  • De Seejungfer:  Un denn 'n Hemd?
  • De Buersfruu:    Ne, denn ward he häkelt.

  • De Seejungfer:  Un denn 'n Hemd?
  • De Buersfruu:    Ne, denn ward he spunn'.

  • De Seejungfer:  Un denn 'n Hemd?
  • De Buersfruu:    Ne, denn ward he wunn'.

  • De Seejungfer:  Un denn 'n Hemd?
  • De Buersfruu:    Ne, denn ward he wewt.

  • De Seejungfer:  Un denn 'n Hemd?
  • De Buersfruu:    Ne, denn ward he bleekt.

  • De Seejungfer:  Un denn 'n Hemd?
  • De Buersfruu:    Ne, denn ward he intweischneeden.

  • De Seejungfer:  Un denn 'n Hemd?
  • De Buersfruu:    Ne, denn ward he tosamneigt.

  • De Seejungfer:  Un denn 'n Hemd?
  • De Buersfruu:    Ja, denn is dat 'n Hemd.

  • De Seejungfer:    Na, denn will ick doch leewer so nakt blieben as ick bün un nie un nimmer 'n Hemd drägen.

Dornah ging de Seejungfer werre to Water un was verschwunn'.

Quelle: eine Sage vom Ostseestrand (Rügensche Sage)